મિડલ ઈસ્ટ તણાવથી વૈશ્વિક બજારોમાં અસ્થિરતા; ક્રૂડ ઓઈલ 100 ડોલર પાર
મિડલ ઈસ્ટમાં અમેરિકા-ઇઝરાયલ અને ઈરાન વચ્ચે વધતા તણાવની સીધી અસર ભારતીય શેરબજાર પર જોવા મળી રહી છે. આજે તા. 9 માર્ચે બજાર ખુલતા જ ભારે વેચવાલી જોવા મળી હતી. સેન્સેક્સ લગભગ 2,300 પોઈન્ટ (2.80%) તૂટીને 76,500ના સ્તરે ટ્રેડ કરી રહ્યો છે. જ્યારે નિફ્ટીમાં પણ આશરે 700 પોઈન્ટ (2.80%)નો ઘટાડો નોંધાયો છે અને તે 23,750ના સ્તરે ટ્રેડ થઈ રહ્યો છે.
આજના ટ્રેડિંગ દરમિયાન બેન્કિંગ, ઓટો, મેટલ, એનર્જી અને FMCG સેક્ટરના શેરોમાં સૌથી વધુ ઘટાડો નોંધાયો છે. રોકાણકારોમાં યુદ્ધને કારણે અનિશ્ચિતતા વધતા બજારમાં વેચવાલી વધી છે.
મિડલ ઈસ્ટમાં ચાલી રહેલા યુદ્ધને કારણે આંતરરાષ્ટ્રીય બજારમાં ક્રૂડ ઓઈલના ભાવમાં ભારે ઉછાળો આવ્યો છે. રવિવારે બ્રેન્ટ ક્રૂડ ઓઈલની કિંમત 100 ડોલર પ્રતિ બેરલને પાર કરી ગઈ છે, જે સાડા ત્રણ વર્ષની સૌથી ઊંચી સપાટી ગણાય છે. શિકાગો મર્કેન્ટાઇલ એક્સચેન્જ પર ટ્રેડિંગ શરૂ થતા જ બ્રેન્ટ ક્રૂડ 16.5% વધીને 108 ડોલર પ્રતિ બેરલ સુધી પહોંચી ગયું હતું. માત્ર ચાર દિવસમાં ક્રૂડ ઓઈલના ભાવમાં આશરે 15% વધારો નોંધાયો છે, જ્યારે યુદ્ધ શરૂ થયા પછીના 10 દિવસમાં લગભગ 48% જેટલો ઉછાળો આવ્યો છે.
જોકે ભારત સરકાર દ્વારા જણાવવામાં આવ્યું છે કે દેશમાં પૂરતો તેલનો જથ્થો ઉપલબ્ધ છે, તેથી હાલ પેટ્રોલ અને ડીઝલના ભાવમાં વધારો થવાની શક્યતા ઓછી છે.
બીજી તરફ એશિયન બજારોમાં મિશ્ર પ્રતિક્રિયા જોવા મળી રહી છે. જાપાનનો નિક્કેઈ ઇન્ડેક્સ લગભગ 3,880 પોઈન્ટ અથવા 7% વધીને 51,740 પર પહોંચ્યો છે. સાઉથ કોરિયાનો કોસ્પી ઇન્ડેક્સ 7% વધીને 5,166 પર કારોબાર કરી રહ્યો છે.
હોંગકોંગનો હેંગસેંગ ઇન્ડેક્સ 676 પોઈન્ટ અથવા 3% વધીને 25,081 પર છે, જ્યારે ચીનનો શાંઘાઈ કમ્પોઝિટ ઇન્ડેક્સ 47 પોઈન્ટ અથવા 1% વધીને 4,075 પર કારોબાર કરી રહ્યો છે.
અમેરિકી બજારમાં પણ ગત 6 માર્ચે ઘટાડો જોવા મળ્યો હતો. ડાઉ જોન્સ 453 પોઈન્ટ (0.95%) ઘટીને 47,501 પર બંધ થયો હતો. નાસ્ડેક કમ્પોઝિટ 1.59% ઘટીને 22,387 પર બંધ થયો હતો, જ્યારે S&P 500 ઇન્ડેક્સ 90 પોઈન્ટ (1.33%) ઘટીને 6,740ના સ્તરે બંધ રહ્યો હતો.
